IBA президенті Умар Кремлёв аралас жекпе-жектің танымал жұлдызы Конор Макгрегор мен ресейлік файтер Пётр Янды бір кеште жолықтыру ниеті барын меңзеді.
Функционер әлеуметтік желіде екі файтердің face to face суретін жариялап, қысқа ғана жазба қалдырған:
«Конор Макгрегор – Пётр Ян. IBA, 2026 жыл. Кеттік».
Айта кетейік, Макгрегор мен Ян бұған дейін де көпшілік алдында көз арбасып, жанкүйерлер қызығушылығын оятқан.
Пётр Ян жеңіл салмақтағы белбеуін қайтарып алып, реваншта Мераб Двалишвилиді айқын басымдықпен жеңген. Бұл нәтиже ықтимал жекпе-жекке деген интриганы одан әрі арттыра түсті.
Ал Конор Макгрегор соңғы жылдары октагонға жиі шыққан жоқ. Дегенмен дереккөздер ирландиялық спортшының қайта оралу жоспары бар екенін, ал қарсылас ретінде Майкл Чендлердің аты аталып жүргенін жазады.
Қазір Дубайда IBA қамқорлығымен бокстан әлем чемпионаты аяқталуға жақын. Сонымен қатар ұйымның Олимпиада жүйесіндегі мәртебесіне қатысты даулы мәселелер бұрыннан айтылып келеді.