Жекпе-жектің нақты уақыты мен орны белгілі.
Екінші жартылай жеңіл салмақта өнер көрсететін қазақстандық боксшы Сұлтан Зауырбек (20-0, 13 КО)О) IBF нұсқасы бойынша әлем чемпионы атағына үміткер болу жолындағы жекпе-жекке қатысты мәлімдеме жасады.
Бұған дейін Халықаралық бокс федерациясы (IBF) Сұлтан Зауырбек пен австралиялық Лиам Уилсон (17-3, 9 КО) арасында іріктеу жекпе-жегін өткізуді бекіткен болатын. Бұл кездесудің жеңімпазы қазіргі әлем чемпионы — мексикалық Эдуардо Нуньеске (29-1, 27 КО) қарсы титулдық айқасқа міндетті үміткер атанады.
Сұлтан Зауырбектің айтуынша, шешуші іріктеу айқасы 2026 жылдың ақпан айында Австралияда өтеді.
«2026 жылдың ақпан айында IBF титулы бойынша финалдық жекпе-жекке Аустралия елінде жұдырықтасамын. Жеңген боксшы чемпиондық үшін қазіргі белдік иегері мексикалық Эдуардо Нуньеспен қолғап түйістіреді», — деді отандасымыз.
Сұлтан Зауырбек соңғы рет 5 сәуірде Астанада рингке шықты. Ол бұл жекпе-жекте Оңтүстік Африка Республикасының боксшысы Азинга Фузилені (18-3, 12 КО) төрешілердің бірауыздан шешімімен жеңіп, IBF Inter-Continental белбеуін жеңіп алған болатын.