Қазақстандық боксшы Алматыда өтетін жекпе-жегін кейінге қалдырды.
Қазақстандық кәсіпқой боксшы Қанат Ислам Алматыда өтуі тиіс болған алдағы жекпе-жегінің кейінге шегерілгенін мәлімдеді.
«Құрметті жанкүйерлерім, 27-сі күні Алматыда өтуі керек бокс кешіне мен шықпайтын болдым. Әртүрлі себептерге байланысты, соның ішінде қарсыластарымызға қатысты жағдайлар бар. Егер бәрі сәтті болса, жекпе-жек шамамен бір жарым айға кейінге қалады. Нақты күні белгілі болғанда, сіздерге міндетті түрде хабарлаймыз», — деді боксшы Instagram парақшасында.
41 жастағы 2008 жылғы Олимпиада ойындарының қола жүлдегері 27 желтоқсанда Алматыда өтетін бокс кешінде жұдырықтасуы тиіс еді.
Айта кетейік, Қанат Ислам кәсіпқой бокста айтарлықтай жетістіктерге жеткен. Ол бірінші орта салмақ дәрежесінде WBA Inter-Continental, WBO NABO, WBO Inter-Continental, WBA Fedelatin және WBA Fedecaribe белбеулерінің иегері атанған.