Өзбекстанның Олимпиада чемпионы Абдумалик Халоков Дубайда (БАӘ) өткен IBA әлем чемпионатындағы ресейлік Всеволод Шумковқа қарсы даулы финалдан кейін қабылданған шешімге қатысты ойын айтты.
60 келіге дейінгі салмақта өткен шешуші жекпе-жек Шумковтың пайдасына аяқталды. Қорытынды нәтиже төрешілердің бөлінген шешімімен ресейлік боксшыға берілді.
Алайда кездесуде көпшіліктің назарын аудартқан оқиға тіркелді. Айқас кезінде Шумков Халоковтың құлағын тістеп алғаны айтылды.
Халықаралық бокс қауымдастығы (IBA) бұл эпизодты кездейсоқ орын алған жағдай деп бағалап, оның жекпе-жектің жалпы нәтижесіне ықпал етпегенін мәлімдеді. Сол себепті финалдың қорытындысы өзгеріссіз қалдырылды.
Абдумалик Халоков шешімнен кейін сабыр сақтап, алдағы жұмысқа көңіл бөлетінін жеткізді:
«Жаттығуды бастап кеттік, не болса да – бәрі Алладан. Бұдан да мықты болып ораламыз», — деді ол.
Айта кетейік, IBA президенті Умар Кремлев Халоков пен Шумков арасында реванш өткізуді ұсынған.