UFC қазақстандық файтердің дебютін ресми жариялады
UFC қазақстандық ММА жауынгері Әліби Ыдырыстың (10-1) промоушндегі алғашқы жекпе-жегін ресми түрде жариялады.
Жекпе-жек қашан және қайда өтеді?
UFC Fight Night турнирі АҚШ-тың Техас штатындағы Хьюстон қаласында, Toyota Center аренасында ұйымдастырылады. Кард АҚШ уақытымен 2026 жылғы 21 ақпанда өтеді (Қазақстан уақытымен — 22 ақпанға қараған түні).
Қарсыласы кім?
Әліби Ыдырыстың қарсыласы — ямайкалық файтер Оде Осборн (13-9). Айқас ең жеңіл салмақта өтуі жоспарланған.
Қазақстандық жауынгер соңғы рет 2025 жылы 16 тамызда (Чикаго) өткен UFC 319 турнирінде октагонға шығып, The Ultimate Fighter жобасының финалында америкалық Джозеф Моралеске (14-2) сабмишнмен есе жіберді. Бұл — Ыдырыстың кәсіби мансабындағы алғашқы жеңілісі.
Осборн қандай формада келеді?
Оде Осборн соңғы жекпе-жегін 2025 жылы 10 тамызда Лас-Вегастағы турнирде өткізіп, аустралиялық Стив Эрцегке төрешілердің бірауызды шешімімен жеңілді.
Айта кетейік, Осборн бұған дейін, 2023 жылы Асу Алмабаевпен кездесіп, төрешілер шешімімен ұтылған.