Қазақстандық ММА өкілі Қуат Хамитов (27-8-2) алдағы жекпе-жегінің өтетін күні мен орнын айтты.
Хамитов Instagram парақшасында жарияланған видеода келесі кездесуінің 14 ақпанда өтетінін жеткізді.
"Ресми түрде: 14 ақпанда менің келесі жекпе-жегім өтеді. Грузия, Батуми — алға!" — деді Қуат Хамитов.
Кездесу Грузияның Батуми қаласында ұйымдастырылады. Турнир халықаралық аренада өтетіндіктен қазақстандық жанкүйерлер үшін бұл — Хамитовтың кезекті маңызды сынағы.
Қуаттың келесі қарсыласы — бразилиялық файтер Алан Силва (19-11-1).
Силва соңғы рет желтоқсан айында октагонға шығып, екінші раундта отандасы Моакир Рошуды (14-10-1) қылғындыру әдісімен (сабмишн) жеңген.
Қуат Хамитов ММА-да ең соңғы жекпе-жегін былтыр қазанда өткізді. Ол ресейлік Анатолий Бойконы (12-5) төрешілердің бірауыздан шығарған шешімімен ұтты.