Қазақстандық боксшылар Махмұд пен Төрехан Сабырхан, сондай-ақ Айбек пен Нұрбек Оралбай World Boxing назарын аударды.
World Boxing-тің ресми парақшасында бокстың тек жеке спорт емес, командалық қолдау мен жақындардың демеуіне сүйенетін ерекше әлем екені айтылған. Ұйымның жазбасында: отбасынан шыққан қолдау — табысқа бастайтын “нағыз рецепт” екені атап өтіледі.
Сол материалда олимпиадалық бокс турнирлерінде қатар жаттығып, бірге өнер көрсететін талантты бокс әулеттері тізімделген. Қазақстаннан бұл қатарға Сабырхан және Оралбай ағайындылары енгізілген.
Айбек Оралбай – қазір ұлттық құраманың капитаны. Сондай-ақ оның World Boxing-2025 әлем чемпионаты финалындағы өзбекстандық Жахонгир Зокировты жеңуі Қазақстанға медаль кестесінде маңызды басымдық әперген.
Қысқасы, Айбектің сол финалдағы нәтижесі – турнирдің жалпы қорытындысына әсер еткен басты эпизодтардың бірі.
Ал Ливерпульде өткен World Boxing әлем чемпионатында Махмұд пен Төрехан Сабырхан ерекше оқиғамен есте қалды. Sports.kz дерегінше, бұл — әуесқой бокста бір турнирде туған екі ағайындының бір мезетте әлем чемпионы атанған алғашқы жағдайы.