Қара күш иесі Зәкір Найманбаев АҚШ-тың Лас-Вегас қаласында өткен Power Slap 18 турнирінде сәтті өнер көрсетіп, рейтингте өзінен жоғары тұрған америкалық файтер Уэс Менаны жеңді.
Зәкір Найманбаев Лас-Вегаста (АҚШ) ұйымдастырылған Power Slap 18 турнирінде октагонға шығып, ауыр салмақтағы мықты қарсыластардың бірі — америкалық Уэс Менамен күш сынасты.
Жекпе-жек қорытындысы бойынша төрешілер бірауыздан жеңісті қазақстандық спортшыға берді. Осылайша Найманбаев ұйым рейтингінде өзінен жоғары тұрған қарсыласын сенімді түрде жеңіп шықты.
Кездесу алдында Зәкір Найманбаев Power Slap ауыр салмақ дәрежесінің рейтингінде алтыншы орында тұрған еді. Ал оның қарсыласы Уэс Мена төртінші сатыда орналасқан. Соған қарамастан сарапшылар бұл текетіресте қазақстандық спортшының мүмкіндігін жоғары бағалады.
Нәтижесінде Найманбаев болжамды ақтап, өз шеберлігін тағы бір мәрте дәлелдеді.
Айта кетейік, Зәкір Найманбаев бұған дейін 2025 жылдың қараша айында өткен Power Slap турнирінде өнер көрсетіп, сол кезде америкалық Дориан Переске төрешілердің бірауызды шешімімен жол берген.
Бұл жолғы жеңіс қазақстандық спортшы үшін аса маңызды болды. Себебі ол өз позициясын жақсартып қана қоймай, ұйымдағы беделін де күшейте түсті.
Power Slap — соңғы жылдары танымал бола бастаған ерекше форматтағы жекпе-жек лигасы. Аталған ұйымның негізін қалаушы — UFC президенті Дана Уайт. Сол себепті бұл жоба әлемдік спорт кеңістігінде айрықша назарға ие.