Лас-Вегаста өткен UFC 326 турнирінің басты жекпе-жегінде бразилиялық Чарльз Оливейра америкалық Макс Холлоуэйді айқын басымдықпен жеңіп, тағдырлы айқаста өз сөзін айтты.
Бұл айқаста Холлоуэй UFC-дегі символикалық BMF белбеуін қорғады. Жекпе-жек жеңіл салмақта өтіп, бес раундқа жоспарланған еді. Нәтижесінде кездесу толық бес раундқа созылып, төрешілер шешімімен аяқталды.
Үш төреші де жеңісті Чарльз Оливейраға берді — 50-45, 50-45, 50-45.
Осылайша бразилиялық файтер карьерасындағы 37-ші жеңісіне жетіп, өз коллекциясына жаңа титул қосты. Ал Макс Холлоуэй аралас жекпе-жектегі тоғызыншы жеңілісіне ұшырады.
Айта кетейік, UFC-дің осы дивизионындағы негізгі чемпион — Испания атынан шығатын, грузиялық Илия Топурия (17-0).
Ол 14 маусым күні Вашингтондағы Ақ үйде өтетін UFC турнирінің мейн-ивентінде америкалық Джастин Гэтжимен (27-5) кездеседі. Гэтжи қазір осы салмақтағы уақытша чемпиондық белбеудің иегері саналады.