Қазақстандық дзюдошы Азияның "алтыны" үшін Олимпиада жүлдегерімен белдеседі
Қытайдың Ордос қаласында дзюдодан Азия чемпионатында Қазақстан құрамасының өкілі Әділет Алмат 81 келіге дейінгі салмақта финалға жолдама алды.
Азия чемпионатының финалына шықты
Қазақстандық дзюдошы турнир барысында өте жоғары деңгейдегі күрес көрсетіп келеді. Ол жартылай финалға дейін отандасы Абылайхан Жұбаназарды айқын басымдықпен жеңіп, көпшілікті таңғалдырды. Осы жеңістен кейін Әділет Алмат келесі айналымда тәжікстандық Бехрузи Ходжазодамен кездесті.
31 жастағы тәжік балуаны халықаралық аренада тәжірибелі спортшылардың бірі саналады. Соңғы жылдары ірі жарыстарда жүлде ала қоймағанымен кез келген мықты қарсыласқа қиындық туғыза алатын дзюдошы. Оның соңғы елеулі жетістігі — 2024 жылы Душанбе Grand Slam турнирінің күміс жүлдесі.
Шешуші сәтте вазари алып, тарихи финалға өтті
Әділет Алмат пен Бехрузи Ходжазода арасындағы белдесу өте тартысты өтті. Екеуі бір-бірінің әдістерін мұқият бақылап, шабуылдарды дер кезінде тоқтатып отырды. Кездесу барысында татамиде қауіпті шабуылдар көп болғанымен негізгі уақытта айқын басымдық ұзақ уақыт тіркелмеді.
Белдесу golden score кезеңіне жақындаған тұста қазақстандық дзюдошы сәтті мүмкіндік тауып, “вазари” ұпайын иеленді. Осылайша Әділет Алмат өз мансабында алғаш рет Азия чемпионатының финалына шықты.
Финалда Олимпиада жүлдегері күтіп тұр
Бұл финал — Әділет Алмат үшін мансабындағы ең маңызды белдесулердің бірі болмақ. Бұған дейін қазақстандық спортшы құрлықтық немесе әлемдік деңгейдегі ірі жетістіктерімен көп көзге түсе қоймаған еді. Сондықтан алдағы шешуші белдесу оның спорттық жолындағы үлкен сын болмақ.
Ал финалда оған өте қауіпті қарсылас жолығады. Тәжікстанның атақты дзюдошысы Сомон Махмадбеков — Париж Олимпиадасының қола жүлдегері және 2024 жылғы әлем чемпионатының жүлдегері. Демек қазақстандық балуан үшін Азия чемпионатының алтынына апарар жол оңай болмайды.