Үш нокдаун және жарақат: Тайбеков финалда өзбек боксшысына есе жіберді
Бокстан Азия чемпионатының финалында отандасымыз Өзбекстан өкіліне есе жіберіп, күміс медаль иеленді.
Индонезия астанасы Джакартада бокстан U19 және U23 жас санаттары арасындағы Азия чемпионатының финалдық кездесулері өтіп жатыр. Қазақстан құрамасының өкілі Тимур Тайбеков 19 жасқа дейінгі спортшылар арасында 80 келіге дейінгі салмақта алтын медаль үшін рингке шықты.
Шешуші жекпе-жекте Тимур Тайбеков Өзбекстан боксшысы Аброрбек Шариповпен жұдырықтасты. Финал өте тартысты әрі драмалық жағдайда өтті. Айқас барысында үш нокдаун тіркелді.
Тимур Тайбеков жекпе-жекті сәтті бастады. Бірінші раундта қазақстандық боксшы қарсыласын нокдаунға түсіріп, айқын басымдық көрсетті. Раунд қорытындысы бойынша төрешілердің барлығы жеңісті Тайбековке берді. Есеп — 5:0.
Екінші үш минуттықта жағдай өзгерді. Бұл жолы Тимур Тайбековтің өзіне нокдаун есептелді. Осы сәт Аброрбек Шариповқа жекпе-жекке қайта оралуға мүмкіндік берді. Өзбекстандық боксшы екінші раундта басымдық танытып, жалпы есепті теңестірді.
Қорытынды раундта жекпе-жек одан әрі шиеленісе түсті. Тайбеков мұрнын жарақаттап, оған медициналық көмек көрсетілді. Кейін қазақстандық боксшыға тағы бір нокдаун есептелді. Бұл финалдың нәтижесіне тікелей әсер етті.
Жеңіс Өзбекстан боксшысына берілді
Жекпе-жек қорытындысы бойынша төрешілердің шешімімен жеңіс Аброрбек Шариповқа берілді.
Осылайша Өзбекстан өкілі U19 Азия чемпионы атанса, Тимур Тайбеков жастар арасындағы құрлықтық біріншіліктің күміс жүлдегері болды.
Азия чемпионаты Джакартада өтіп жатыр
Жастар арасындағы Азия чемпионаты World Boxing ұйымының құрлықтық құрылымы — Asian Boxing аясында ұйымдастырылып жатыр.
Бұл форматтағы турнир екінші рет өткізілуде. Алғашқы жарыс 2025 жылдың тамызында Бангкокта өткен. Биылғы додада U19 және U23 жас санатындағы боксшылар құрлықтық медальдар үшін бақ сынауда.