Бес белдесу, бес жеңіс: Дияр Аманәлі әлемді мойындатты
Қазақстан құрамасы Бакуде күрес түрлерінен U17 әлем чемпионатында алтын медалін иеленді.
Финалдағы үстемдік
Грек-рим күресінің өкілі Дияр Аманәлі 55 келіге дейінгі салмақ дәрежесінің финалында венгриялық Кеве Ковачты жеңді.
Тартысты өрбіген финалдық белдесу 1:1 есебімен аяқталды. Дегенмен соңғы нәтижелі әдісті қазақстандық балуан орындағандықтан жеңіс Аманәліге берілді.
Финалға дейінгі жорық
Дияр Аманәлі әлем біріншілігінде бес белдесу өткізді. Алғашқы айналымда грекиялық Николаос Зинисисті 8:0 есебімен мерзімінен бұрын жеңді.
Келесі белдесуде ресейлік Эдем Пайзиевтен 3:1 есебімен басым түсті. Ширек финалда Грузия елінің балуаны Гиорги Кеделидзені жеңіп, жартылай финалға жолдама алды.
Финалға шығар белдесуінде болгариялвқ Данимир Йордановты 8:1 есебімен сенімді түрде ұтты.
Еске салайық, бүгін алтыннан бөлек Қазақстан қоржынына күміс медаль түсті. Оның иесі — Әли Алмас. Ол 48 келі салмақ дәрежесінде белдесті.