"Дағыстандық қазақ" Пейджбен реванш үшін UFC турниріне араласуға дайын
UFC-дің орта салмақтағы файтері Шарабутдин Магомедов Майкл Пейджден жеңілістің есесін қайтаруға ынталы.
Шара Буллет Майкл Пейджбен реванш өткізгісі келеді
Ресейлік аралас жекпе-жек шебері Шарабутдин Магомедов кәсіби мансабындағы жалғыз жеңілісін ұмытпағанын жеткізді.
"Шара Буллет" лақап атымен танымал файтер UFC-де Майкл Пейджден ұпай санымен жеңілген еді. Енді британдық файтермен қарымта кездесу өткізуге ниетті.
Магомедовтың сөзінше, Нурсултон Рузибоев жарақат алып немесе басқа себеппен жекпе-жекке қатыса алмай қалса, ол өзбекстандықтың орнын басуға әзір.
Рузибоевтің орнына шығуға дайын
Шарабутдин Магомедов Namys Fighting арнасына берген сұхбатында Майкл Пейджбен қайта кездесуге қызығушылық танытты.
"Пейджбен жұдырықтасу мен үшін қызық. Рузибоев ауырып қалса немесе оған бір жағдай болса, оны алмастыруға дайынмын. Пейджден реванш алғым келеді. Егер ол Рузибоевті жеңсе, менімен төбелескісі келмеуі мүмкін. Ал жеңілсе, қарымта кездесуге келісуі ықтимал. Рузибоев — Өзбекстанның жігіті, онымен жұдырықтасуға аса құлшынысым жоқ", — деді Магомедов.
Пейдж — Рузибоев жекпе-жегі қашан өтеді?
Майкл Пейдж бен Нурсултон Рузибоев арасындағы орта салмақтағы жекпе-жек UFC Fight Night 287 турнирі аясында өтеді. Жарыс 5 қыркүйекте Парижде ұйымдастырылады.
Бұл кездесу Майкл Пейдж үшін UFC ұйымымен жасалған қазіргі келісімшарттағы соңғы жекпе-жек болмақ. Сондықтан британдық файтердің промоушендегі болашағы осы кездесуден кейін белгілі болуы мүмкін.
Пейдж Шара Буллетті қалай жеңген еді?
Майкл Пейдж пен Шарабутдин Магомедов бұған дейін октагонда кездескен.
Үш раундқа созылған жекпе-жектің қорытындысында төрешілер бірауыздан британдықты жеңімпаз деп таныды. Бұл нәтиже Шара Буллеттің кәсіби мансабындағы алғашқы әрі әзірге жалғыз жеңілісі болды.
Сол себепті Магомедов Пейджбен екінші мәрте кездесіп, жеңілісінің есесін қайтаруды басты мақсаттарының бірі санайды.
Шара Буллетті неліктен "Дағыстандық қазақ" деп атайды?
Шарабутдин Магомедовтың Қазақстанда жанкүйерлері көп. Оның Алматыда жеке жаттығу залы бар және елдегі ММА аудиториясы арасында танымал.
Осыған байланысты қазақстандық жанкүйерлер оған "Дағыстандық қазақ" деген бейресми лақап ат берген.