Алғашқы белдесуде жеңілген қазақ балуаны ӘЧ қола жүлдегері атанды
Әлинұр Төлеуғали грек-рим күресінен 17 жасқа дейінгі балуандар арасындағы әлем чемпионатында жүлдеге қол созды.
Ирандық балуаннан басым түсті
Бакуде жасөспірімдер арасында күрестен әлем чемпионаты жалғасып жатыр. Грек-рим күресінен 71 келіге дейінгі салмақ дәрежесінде сынға түскен Әлинұр Төлеуғали қола медаль Эсмаил Захердустпен белдесті.
Қазақстандық балуан айқын басымдық танытып, 11:3 есебімен жеңіске жетті. Осылайша Абай облысының өкілі әлем чемпионатының қола жүлдегері атанды.
Төлеуғали жарысты сәтсіз бастады
Әлинұр Төлеуғали турнирдегі алғашқы белдесуінде ресейлік Аслан Зуевке 3:6 есебімен есе жіберген еді. Бірақ Зуев финалға шыққандықтан қазақ балуаны жұбаныш белдесулеріне қатысу мүмкіндігін алды. Жұбаныш кезеңіндегі алғашқы кездесуінде молдовалық Богдан Талмачиді 9:0 есебімен ойсырата жеңді.
Ал келесі белдесуде украиналық Роман Иванюкпен күш сынасты. Тартысты жекпе-жек 2:2 есебімен аяқталды. Соңғы нәтижелі әдісті қазақстандық балуан орындағандықтан жеңіс Төлеуғалиге берілді.
Осы нәтиженің арқасында Әлинұр қола медаль үшін күресуге мүмкіндік алды.