Көзіне ота жасатқан балуан әлем біріншілігінде белдеспек
Әлем чемпионаты Албанияда 28-31 қазан аралығында өтеді.
Қазанның 28-і күні Албания астанасы Тиранада күрес түрлерінен әлем чемпионаты басталады. Байрақты бәсекеде спортшылар Олимпиада бағдарламасына енбеген салмақтар бойынша бақ сынайды.
Грек-рим күресінен құраманың бас бапкері Юрий Мельниченко төрт балуанға сенім артады:
Ихсар Курбаев (55 келі)
Ержет Жарлықасын (63 келі)
Мейіржан Шермахамбетов (72 келі)
Евгений Поливадов (82 келі)
Айта кетейік, балуандардың арасында Мейіржан Шермаханбет 2022 жылы Үндістанның Дели қаласында ота жасатқан еді. Командаластарымен баскетбол ойнап жүргенде көзіне байқаусызда басқа ойыншының қолы кіріп кеткен болатын. Осының салдарынан, спортшының көру мүмкіндігі 70 пайызға нашарлады. Отаның арқасында жағдайы қазір қалыпқа келіпті.
Естеріңізге сала кетейік, Мейіржан Шермаханбет 2018 жылғы әлем чемпионатының қола жүлдегері, 2022 жылғы Азия чемпионы.