Әлемнің үздік бапкері келгеннен кейін қазақстандық таэквондошылар медаль жеңіп алды
Қазақстандық таэквондошы Самирхон Абабакиров Түркияның Анталья қаласында өтіп жатқан Turkish Open халықаралық турнирінде қола жүлдегер атанды.
Абабакиров ширек финалда Париж Олимпиадасының жүлдегері, әзербайжандық Гашим Магомедовті жеңді. Бірақ жартылай финалда ресейлік Дмитрий Шишкоға есе жіберіп, турнирдің қола жүлдегері атанды.
Осылайша қазақстандық спортшы екінші жыл қатарынан беделді турнирде медаль жеңіп алды. Былтыр Абабакиров финалға дейін жеткен.
Сонымен қатар, 87 келі салмақ дәрежесінде тағы бір қазақстандық спортшы Нұрқанат Қожахмет те қола жүлдеге ие болды.
Айта кетейік, жақында Қазақстан таэквондо құрамасының бас бапкері қызметіне Есбол Сұлтанов тағайындалған болатын. Сұлтанов 2024 жылы Дүниежүзілік таеквондо федерациясы (WT) тарапынан әлемнің үздік бапкері деп танылды.