Санжар Тәшкенбайдың сенсациялық жеңілісі: Мәселе қолғапта ма?
Қазақстан бокс федерациясы Болгарияның София қаласында өтіп жатқан "Странджа-2025" кубогында Санжар Тәшкенбайдың күтпеген жеңілісіне қатысты ресми мәлімдеме жасады.
Бүгін 48 кг салмақ дәрежесінде өнер көрсететін қазақстандық боксшы Санжар Тәшкенбай “Странджа” турнирінің 1/4 финалында ирландиялық Луис Руниге қарсы шыққан еді. Алайда жекпе-жек бірінші раундта аяқталды.
ҚБФ баспасөз қызметінің мәлімдеуінше, Санжар Ташкенбай жекпе-жек барысында қолынан жарақат алған. Осыған байланысты ол кездесуді жалғастыра алмады. Қазір спортшыға медициналық көмек көрсетілуде.
Мәселе қолғапта ма?
Белгілі спорт журналисі Уалихан Қосанбай жарыста қолғаптардың өте жұқа екенін, ал қолды қалың орауға рұқсат берілмегенін мәлімдеді. Осыған байланысты Ұлттық құраманың өкілдері халықаралық бокс қауымдастығына (IBA) аталған жайт жайлы ескертпек екен.