Карина Ибрагимова қарсыласын ойсырата жеңді (ВИДЕО)
Қазақстандық боксшы Карина Ибрагимова Сербияның Ниш қаласында өтіп жатқан 2025 жылғы әйелдер арасындағы әлем чемпионатындағы жорығын бастады.
57 келіге дейінгі салмақ дәрежесінде 1/8 финалда рингке шыққан Ибрагимова колумбиялық Валерия Арболеда Мендосамен кездесті. Қазақстандық спортшы қарсыласынан айқын басым түсіп, төрешілердің бірауызды шешімімен 5:0 есебімен жеңіске жетті.
Бұл жеңістің арқасында Карина Ибрагимова әлем чемпионатының ширек финалына жолдама алды және жүлделі орындарға таласын жалғастырады. Айта кетейік, Ибрагимова бұған дейін де әлемдік ареналарда жоғары нәтижелерге қол жеткізген тәжірибелі спортшы. Оның жетістіктері қатарында:
- 2023 жылғы әлем чемпионатының күміс жүлдесі,
- 2018 және 2022 жылдардағы әлем чемпионатының қола медальдары,
- 2022 жылғы Азия чемпионы атағы,
- 2022 жылғы Жазғы Азия ойындарының күміс жүлдесі бар.
Карина Ибрагимованың қарсыласы Валерия Арболеда Мендоса да беделді боксшылардың бірі. Оның мансабындағы ең үлкен жетістігі — Панамерикалық ойындардың күміс жүлдесі.