Ел намысын халықаралық ареналарда абыроймен қорғап жүрген жас әрі дарынды боксшы Төрехан Сабырхан енді Атырау облысы атынан жарыстарға қатысатынын ресми түрде мәлімдеді.
Бұл жаңалықты алғаш болып "Спорт Шредингера" Telegram-арнасы таратты. Бұған дейін Төрехан Түркістан облысының намысын қорғап келген еді.
"Иә, мен енді ресми түрде Атырау үшін шаршы алаңға шығамын. Өз басым шешім қабылдадым. Түркістанмен байланысты аздаған техникалық мәселелер қалғанымен, жалпы алғанда көшу рәсімі аяқталды. Бұл бір сенсация емес. Ең маңыздысы — бәріміз Қазақстанды танытып жүрміз. Ал ішкі аренада мен енді Атырауды таныстырамын", — деді спортшы "Бірінші бол" подкастында.
Танымал боксшының ағасы Махмұд Сабырхан да бұл өзгеріс жайлы пікір білдірді. Оның айтуынша, Түркістан облысынан халықаралық жеңістерден кейін ешқандай қолдау болмаған.
"Төрехан біраз табыстарға қол жеткізді. Бірақ оған қолдау жеткіліксіз болды. Сондықтан осындай шешім қабылдауға мәжбүр болдық", — деді ол.
