Қазақстандықтар автонөмірді өз қалауынша таңдауға мүмкіндік алуы мүмкін
Қазақстанда VIP-нөмірлерге қатысты жаңа өзгерістер енгізілуі мүмкін. Жаңа Салық кодексі жобасында ерекше сұранысқа ие мемлекеттік тіркеу нөмірлері (ГРНЗ) үшін тарифтік жүйе кеңейтілмек. Бұл бастама жүзеге асса, қазақстандықтар автонөмірлердің әріп пен сан комбинациясын өз қалауы бойынша таңдай алады.
VIP-нөмірлерге сұраныс жоғары
Көлік жүргізушілері арасында "әдемі" нөмірлер, яғни 001, 777 немесе бірдей әріптік белгісі бар тіркеу нөмірлері үлкен сұранысқа ие. Мұндай нөмірлер үшін кейбіреулер жүздеген мың теңге төлеуге дайын.
Жаңа Салық кодексі не ұсынады?
Журналистер танысқан жаңа жобада келесі ұсыныстар қамтылған:
- "Айна тәрізді" сандар – мысалы, 151, 232, 383, 474, 595, 676, 717, 828 немесе 989 – 15 АЕК (2025 жылы шамамен 58 980 теңге) тұрады. Егер мұндай сандарға бірдей әріптер қосылса, баға 72 АЕК-ке (2025 жылы 283 104 теңге) дейін өседі.
- Азаматтар өз қалауы бойынша әріптер мен сандар комбинациясын еркін таңдай алатын болады (мысалы, өз инициалдары). Мұндай қызметтің бағасы – 10 АЕК (39 320 теңге).
- Ал VIP-комбинациялар үшін ең жоғарғы баға 285 АЕК-ке дейін жетуі мүмкін – бұл 2025 жылы 1 120 620 теңге.
Қазіргі қолданыстағы бағалар қандай?
Қазірдің өзінде VIP-нөмірлер үшін салықтық төлемдер бар:
- 010, 020, 030 секілді нөмірлер – 57 АЕК.
- Егер осындай сандарға бірдей әріптер қосылса – 114 АЕК.
- VIP нөмірлер (001, 002, 777) – 228 АЕК, ал бірдей әріптермен болса – 285 АЕК.
Өз нөміріңді өзің құрастыру – 2026 жылдан бастап?
Қазір салық кодексі жобасы Парламент Сенатында қаралуда. Егер депутаттар қолдаса, 2026 жылдан бастап әр қазақстандық өз автокөлігіне жеке комбинацияны таңдап, "бірегей" нөмірге ие бола алады.
Сонымен қатар, бұрынғыдай мемлекет ұсынған дайын нөмірлерді алуға да болады. Ондай жағдайда 2,8 АЕК көлемінде ғана мемлекеттік баж салығы төленеді.