Италия Гран-приі: Ферстаппен жаңа рекорд орнатып, квалификацияны жарды!
Red Bull Racing командасының жұлдызы Макс Ферстаппен Италия Гран-приінің квалификациясында жаңа рекорд орнатып, поул-позишнді жеңіп алды. Бұл – Монцадағы нағыз жарқын көрсеткіш.
Квалификация финалында үздік нәтиже көрсеткен Ферстаппен, Монцада жаңа трасса рекордын орнатты – 1 минут 18,792 секунд. Бұл нидерландиялық пилоттың биылғы маусымдағы бесінші, ал мансабындағы 45-ші поулы болды.
Екінші және үшінші уақытты McLaren командасының өкілдері Ландо Норрис пен Оскар Пиастри тіркеді. ТОП-10 қатарына бұдан кейін Шарль Леклер мен Льюис Хэмилтон (екеуі де – Ferrari), Джордж Расселл мен Андреа Кими Антонелли (екеуі де – Mercedes), Габриэль Бортолето (Sauber), Фернандо Алонсо (Aston Martin) және Юки Цунода (Red Bull) енді.
Ферстаппен жарыстан кейін өзінің әсерімен бөлісті. Оның айтуынша, шешуші сессия алдында команда болидтің баптауын өзгертіп, жылдамдықты арттыра алды:
«Бұл трассада төмен аэродинамикалық қысымның кесірінен қателесу оңай. Бірақ біз бәрін дұрыс істедік. Машинам бүкіл уик-энд бойы жақсы жүрді, поул – бұл фантастикалық нәтиже!», – деді голландиялық пилот.
Жарысқа дейін Red Bull-дың қарқыны жеткіліксіз болып көрінгенімен, дұрыс техникалық шешім Максты тағы да шыңға шығарды.
Юки Цунода да жарқырады
Red Bull-дың екінші пилоты Юки Цунода да финалға өтіп, оныншы уақыт көрсетті. Алайда Льюис Хэмилтон алған жазаға байланысты жапондық жас шабандоз жарысты тоғызыншы орыннан бастайды.
«Финалға шығу – мен күткен нәтиже. Әрбір Гран-при сайын біз прогресс жасап келеміз. Өткен аптада Зандфортта ұпай алуымыз соның дәлелі. Әрине, Монцада слип-стримсіз қиын болды, бірақ мен өзімнің тұрақтылығымды дәлелдеп жүрмін», – деді Цунода.
Ол сонымен қатар командадағы бірлікті ерекше атап өтті:
«Барлығы бір мақсат үшін жұмыс істеп жатыр. Максты поулмен құттықтаймын – бұл оңай жетістік емес».
Монцада алынған поул – Ферстаппеннің үстемдігін тағы да дәлелдеді. Цунода да тұрақтылық көрсетіп, ортаңғы пелотонда сенімді қадамдар жасауда. Бірақ басты сұрақ – Red Bull бұл артықшылықты жексенбідегі негізгі жарыста сақтай ала ма?
Формула-1 жанкүйерлері үшін алда үлкен интрига: Монцадағы жылдамдық пен стратегия кімнің пайдасына шешілер екен?