2026 жылдан бастап қымбат көліктерге салық енгізіледі
Мәселен, құны 80 млн теңге тұратын автомобильге 8 млн теңге көлемінде акциз салығы қосылады.
Қазақстанда 2026 жылдан бастап құны 74 миллион теңгеден асатын жеңіл көліктерге жаңа акциз салығы енгізіледі. Жаңа Салық кодексі бойынша мұндай автоларды сатып алу мен қайта сату кезінде көлік бағасының 10%-ына тең қосымша төлем жасауға тура келеді.
18 шілдеде Президент қол қойған жаңа Салық кодексі 2026 жылдың 1 қаңтарынан бастап күшіне енеді. Кодексте 18 000 АЕК-тен жоғары құны бар көліктер акциздік тауар қатарына енгізілген. Бұл өзгеріс Қазақстандағы люкс-класс автомобиль нарығына тікелей әсер етпек.
Акциз қалай есептеледі
Мемлекеттік кірістер комитетінің түсіндіруінше, акциз көлік құнын растайтын құжаттар негізінде есептеледі:
- Шетелден әкелінсе — кедендік рәсімдеу кезіндегі шот-фактура (инвойс) негізінде;
- Қазақстан ішінде сатылса — сатып алу-сату келісімшарты немесе меншік құқығын растайтын өзге құжат арқылы.
Мәселен, құны 80 млн теңге тұратын автомобильге 8 млн теңге көлемінде акциз салығы қосылады.
Келісімшарттағы баға тексеріле ме?
Алғашқы кезеңде салық органдары келісімшартта көрсетілген бағалардың шынайылығын тексермейді. Бірақ болашақта электронды сауда алаңдарындағы орташа нарықтық бағамен салыстыру тәжірибесі енгізілуі мүмкін. Бұл қадам жалған бағаларды көрсетіп, салықтан жалтаруға жол бермеу үшін жасалмақ.
Салық кодексіне сәйкес, акциз мына екі мерзімнің қайсысы ертерек болса, сол күніне дейін төленуі тиіс:
- Көлік сатып алынған айдан кейінгі айдың 20-сына дейін;
- Мемлекеттік тіркеу үшін құжат тапсырған сәтке дейін.