Дана Нұржігіт әріптесі Диас Ахметшәріппен өткен соңғы тікелей эфирді тебіреніспен еске алды
Танымал тележүргізуші марқұм әріптесі туралы жүрекжарды жазба қалдырды.
Белгілі журналист әрі қоғам қайраткері Дана Нұржігіт марқұм спорт комментаторы Диас Ахметшәріппен өткен соңғы тікелей эфирді еске алды. Желі қолданушыларына әсерлі жазбасын жариялаған тележүргізуші әріптесін сағынышпен еске түсірді.
"Алдыңнан жарылқасын, Диас! Бұл біздің соңғы тікелей эфиріміз екен. Ол кезде мұның соңғысы екенін кім білген…" – деп жазды Дана Нұржігіт өзінің әлеуметтік желідегі парақшасында.
Диас Ахметшәріп — отандық спорт журналистикасының көрнекті тұлғасы
Айта кетейік, Диас Ахметшәріп бірнеше апта бойы ес-түссіз жатып өмірден өтті. Ол отандық спорт журналистикасының қалыптасуына елеулі үлес қосқан тұлғалардың бірі. "Qazsport" телеарнасының алғашқы басшысы және елімізге кеңінен танымал спорт шолушысы ретінде есімізде қалды.
Ахметшәріптің кәсіби жолы көптеген жас мамандарға бағыт-бағдар берді. Оның эфирдегі нақышты дауысы мен спортқа деген ерекше сүйіспеншілігі көрермен жадында мәңгі сақталады.