Әйелдер құрамасының капитаны және Қазақстан боксының жұлдызы Назым Қызайбай алдағы әлем чемпионатына дайындық барысын бөлісіп, жанкүйерлеріне шабыт сыйлады.
Танымал боксшы қыз жаттығу залынан түсірілген суретін Instagram парақшасына жариялап, астына шабытты жазба қалдырды:
"Егер сен өз ісіңді сүйсең — бәріне төзесің. Басқаларға мүмкін емес көрінетін нәрселердің өзін еңсеруге болады", — деп жазды Назым.
Бұл сөздер тек спортшыларға емес, кез келген адамға арналған мотивацияға айналды.
Назым Қызайбай — Қазақстан әйелдер боксы тарихындағы ең титулды спортшы. Ол — әлем чемпионатын үш мәрте жеңіп алған алғашқы және әзірге жалғыз қазақстандық әйел боксшы.
Соңғы жетістігі — 2025 жылы Астанада өткен World Boxing Кубогының финалында алтын медаль иеленуі.
Алдағы әлем чемпионаты 2025 жылдың 4–14 қыркүйегі аралығында Ливерпуль қаласында M&S Bank Arena аренасында өтеді. Бұл — World Boxing ұйымының ұйымдастыруымен өтетін алғашқы әлем біріншілігі болмақ.
Қызайбай осы турнирде Қазақстан намысын қорғайтын басты үміткерлердің бірі.