Қазақстанда жаңа футбол клубы құрылды
Қазақстан футболы үшін жағымды жаңалық! Елде кәсіби деңгейде тағы бір жаңа команда пайда болды.
Қазақстан футбол федерациясының кәсіби клубтар арасындағы жарыстарды ұйымдастыру дирекциясының басшысы Бақытжан Пазылхайырдың айтуынша, Екінші лигада өнер көрсететін жаңа команда — “Жайық” ресми түрде құрылды.
“Батыс Қазақстан облысының әкімдігі бұл бастаманы қолдап, жаңадан "Жайық" клубы құрылды. "Ақжайықтың" футболшылары енді осы командаға өтеді. Жалақы бойынша қарыздар толық өтеледі. Команда Қазақстанның Екінші лигасында өнер көрсетеді. Сәттілік тілейміз”, — деді Пазылхайыр “Nursultan Qurman” подкастында.
Жыл басында Батыс Қазақстан облысының әкімдігі Бірінші лигада ойнаған “Ақжайық” клубының орнына жаңа команда құру туралы шешім қабылдаған. Енді бұл шешім нақты іске асып отыр. Футболшылар, инфрақұрылым мен даму бағыты түгелдей жаңарып, аймақ футболының болашағы үшін маңызды қадам жасалды.