Зайнутдиновсыз қалған "Бешікташ" қатарынан төрт матчта жеңіске жете алмай жүр
Футболдан Түркия чемпионатының 32-туры аясында "Бешікташ" сырт алаңда "Гёзтепемен" ұпай бөлісті. Қазақстандық жартылай қорғаушы Бахтиёр Зайнутдинов бұл кездесуге қатысқан жоқ.
"Бешикташ" кезекті турда "Гёзтепе" командасына қонаққа барды. Матч 1:1 есебімен аяқталды. Кездесудің 10-минутында Рафа Силва есеп ашып, "Бешікташты" алға шығарған. Алайда екінші таймның басында, 46-минутта Исмаил Кёйбаши таразы басын теңестіріп, "Гёзтепеге" бір ұпай сыйлады.
Қазақстандық футболшы Бахтиёр Зайнутдинов жарақатына байланысты бұл матчта алаңға шыққан жоқ. Оның командасына қосылмауы "Бешікташтың" ойынына әсер етті деуге негіз бар. Клуб Зайнутдиновсыз төрт ойында қатарынан жеңіске жете алмай келеді: екі тең ойын, екі жеңіліс.
Қазірг "Бешікташ" 49 ұпаймен Түркия Суперлигасының турнирлік кестесінде бесінші орында тұр. Ал "Гёзтепе" 40 ұпай жинап, ондыққа кіріп отыр. Чемпионаттың аяқталуына аз уақыт қалғанын ескерсек, "Бешікташ" үшін әрбір ұпай маңызды.