"Тек Сәтпаевты көремін!" - ИК-дағы Алдик Дастанға өз бағасын берді

«Ирина Кайратовна» тобының мүшесі, танымал актер және әнші Алдияр Жапарханов (Aлдик) қазақстандық футболды қаншалықты бақылап отыратынын айтып, ҚПЛ-де өзіне жақын ойыншыны атады.

«ҚПЛ-ды емес, Сәтпаевты қараймын»

SportPulse подкастында сөз сөйлеген Жапарханов өз көзқарасын ашық білдірді:

«ҚПЛ-ды қарамаймын. Себебі мен үшін “Ертіс” жоқ жерде қызық жоқ. Қазір тек Бірінші лигадағы матчтарды қараймын. Ал ҚПЛ-дан тек “Қайрат” пен Дастан Сәтпаевтың нәтижелерін қадағалаймын. Ол үшін қатты қуанам. Қазірдің өзінде 5 гол соққанын білем. “Қайраттың” әр ойынынан кейін тексерем – Сәтпаев гол салды ма деп», – деді ол.

16 жастағы талант жарқырауда

“Қайраттың” жас шабуылшысы Дастан Сәтпаев 2025 жылғы маусымды сенсациялық деңгейде өткізіп жатыр. ҚПЛ-дың алғашқы 7 турында ол:

• 4 гол соқты,

• 2 нәтижелі пас берді,

• жалпы 6 голдық әрекетке тікелей қатысқан.

Сондай-ақ, Қазақстан Кубогының 1/8 финалында “Каспий” қақпасына ғажайып гол соғып, өзінің кубоктық есебін де ашты.

Алдиктің жүрегі – «Ертісте»

Алдияр Жапарханов өз сөзінде Павлодардың “Ертіс” клубы – сүйікті командасы екенін де ерекше атап өтті. Қазіргі таңда:

• “Ертіс” Бірінші лиганың турнир кестесінде көш бастап тұр,

• Қарағандылық “Шахтермен” бірге 4 турдан кейін 10 ұпайдан жинап, 1-орынды бөлісуде.

16 жастағы Дастан Сәтпаев қазірдің өзінде қазақстандық футбол жанкүйерлерінің басты назарындағы ойыншыға айналды.