Бәрі ақша үшін бе? Қазақстан УЕФА-да не үшін жүр?
Бас бапкер Әли Әлиев Астанада өткен баспасөз мәслихатында футбол жанкүйерлерін мазалаған маңызды сұрақтарға жауап берді.
Қазақстан ұлттық құрамасының бас бапкері Әли Әлиев Астанада өткен баспасөз мәслихатында УЕФА мен АФК арасындағы таңдау, ұлттық құраманың болашағы және алдағы матч жайлы пікір білдірді. Бұл жиын 9 маусым күні өтетін Солтүстік Македонияға қарсы матч қарсаңында ұйымдастырылды.
“АФК-та ондай қолдау жоқ”
Журналистер қойған сауалдардың бірі:
«Франция мен Бельгиядан ұтылғанша, Өзбекстан секілді Азия арқылы әлем чемпионатына шығу тиімді емес пе?» – болды.
Оған жауап ретінде Әли Әлиев былай деді:
«Сізбен толықтай келісемін – чемпионатқа шығу бәріміздің арманымыз. Бірақ бұл – спорттық блоктан бөлек, жоғары жақ шешетін мәселе. Біз УЕФА-дан ұзақ жылдар бойы футболды дамытуға қаржылай қолдау алып келеміз. Ал АФК-та ондай жүйе жоқ», – деді бас бапкер.
Қазақстан неге әлі күнге дейін әлем чемпионатына шыққан жоқ?
Қазақстан құрамасы 2002 жылдан бастап УЕФА құрамында ойнап келеді. Осы уақыт аралығында ұлттық құрама бірде-бір ірі турнирге қатыса алмады. Дегенмен, соңғы жылдары Магомед Адиевтің басшылығымен құраманың нәтижесі жақсарды:
- Ұлттар лигасында C тобын жеңіп шықты
- ЕВРО-2024 іріктеуінде 18 ұпай жинап, тарихи рекорд орнатты
- Соңғы турға дейін екінші жолдама үшін күресті
9 маусым – Солтүстік Македониямен матч
Қазақстан құрамасы 9 маусым күні Астана-Аренада Солтүстік Македонияға қарсы кездесу өткізеді. Ойын сағат 19:00-де басталады.
Еске салайық, 5 маусым күні Борисов қаласында Қазақстан құрамасы Беларусьтен 1:4 есебімен жеңіліп, сын астында қалған еді. Бұл нәтиже бапкерлік штаб пен ойыншыларға қатысты қоғамда түрлі пікір туғызды.