Бақтиер Зайнутдинов "Динамоға" не үшін ауысқанын түсіндірді (ВИДЕО)
Қазақстан ұлттық құрамасының ойыншысы Бақтиер Зайнутдинов өзінің Мәскеудің "Динамо" клубына ауысуының себебін түсіндіріп, жаңа командадағы алғашқы әсерін бөлісті.
28 шілде күні ресми түрде таныстырылған ойыншы төрт жылдық келісімшартқа қол қойды. Бұған дейін Бақтиер Түркияның “Бешікташ” клубының намысын қорғаған.
Бақтиер: “Мақсат — алтын үшін күресу”
“Динамо” клубының бір бөлшегі болғаныма өте қуаныштымын. Жігіттер мені жылы қарсы алды. Командадағы бес-алты ойыншымен бұрыннан таныспын. Өзімді үйде жүргендей сезініп отырмын”, — деді Бақтиер клубтың баспасөз қызметіне берген сұхбатында.
Ол бапкер Валерий Карпиннің жаттығу жүйесіне де тоқталып өтті:
“Георгиевичтің (Карпин — ред.) жаттығу жүктемесі өзгеше, өте қарқынды. Жаттығу жиынынан өттім, біртіндеп бабым келіп жатыр. “Динамо” — амбициясы бар команда. Жоғары орындар үшін күрескім келеді. Чемпион болу — арманым”.
Артта қалған кезең: “Бешікташтағы” қиындықтар
Зайнутдинов соңғы жарты жылда Түркияда алаңға жиі шықпады. Жарақаттар мен бапкерлер ауысуы оның мансабына кері әсерін тигізді. 2024 жылдың ақпанынан бері ол алаңға тек эпизодтық түрде шығып жүрді.