"Роналду – біздің құндылығымыз". Португалия федерациясы дауға қатысты мәлімдеме жасады

Португалия футбол федерациясының президенті Педру Проэнса ұлттық құрама бас бапкері Жорже Жезуш пен шабуылшы Криштиану Роналду арасындағы кикілжіңге қатысты мәлімдеме жасады. Оның айтуынша, бұл жағдайды үлкен дауға айналдырудың қажеті жоқ және мәселе команда ішінде шешілуі тиіс.

Record басылымына берген пікірінде Проэнса Роналдудың Португалия футболындағы орнын ерекше атап өтті.

"Мен бұл тақырыпты егжей-тегжейлі түсіндірмеймін, себебі бұл бапкер мен футболшылар арасындағы қалыпты жұмыс процесі. Мұндай мәселелер бас бапкердің құзыретінде. Криштиану – тарихтағы ең ұлы ойыншылардың бірі. Ол Португалия футболына жиырма жылдан астам уақытын арнады. Роналду – біздің ұлттық болмысымыздың маңызды бөлігі", – деді федерация президенті.

Ол Роналдудың құрамаға тек спорттық көрсеткіштері бойынша шақырылатынын да айтты.

"Оның ұлттық құрама сапында болуы тек спорттық себептерге байланысты. Бұған күмән жоқ. Физикалық жағдайы мүмкіндік бергенше, ол командада қала береді", – деді Проэнса.

"Бұл – жай ғана түсініспеушілік"

Федерация басшысы Жезуш пен Роналду арасындағы жағдайды шешуге болатын мәселе деп бағалады.

"Бұл – жай ғана түсініспеушілік. Оны команданың ішінде шешу керек. Футболшылардың өздері де капитанмен байланысының мықты екенін көрсетті. Криштиану – ұлттық құраманың бір бөлігі әрі біздің көшбасшымыз", – деді ол.

Проэнсаның айтуынша, төрт матч аяқталғаннан кейін тараптар бұл мәселені сабырлы жағдайда талқылай алады.

"Мұндай жағдайлар барлық үш тарап – федерация, бас бапкер және футболшылар қатысқанда шешіледі", – деді ол.

Сөз соңында Роналдудың болашағы бас бапкердің шешіміне байланысты екенін айтты.

"Роналду – біздің құндылығымыз. Бапкер қажет деп санаған уақытқа дейін ол команданың қарамағында болады", – деді Проэнса.

Роналду құрама лагерінен кеткен еді

Бұған дейін Криштиану Роналду Ұлттар лигасының үшінші турында Данияға қарсы өткен матч алдында Португалия құрамасының лагерінен кеткені хабарланды.

Португалиялық бірқатар БАҚ Роналдудың ұлттық құрамадағы мансабын аяқтауы мүмкін екенін жазды. Сонымен қатар Жорже Жезуштің шабуылшымен татуласу үшін жеке кездесуге дайын екені және оны қараша айындағы матчтарға шақыруы мүмкін екені хабарланды.