Миллиардтар! "Қайрат" еурокубоктан қанша табатыны есептелді
Алматылық клубқа Еуропаның басты турнирінен миллиардтаған теңге табыс түсуі мүмкін – бұл үшін командаға екі қарсыласын жеңу жеткілікті.
Алматылық "Қайрат" футбол клубы Чемпиондар лигасының топтық кезеңіне жолдама алса, еуропалық клубтық турнирден рекордтық қаржы алмақ. УЕФА тарапынан алматылық ұжым 18,62 миллион еуро немесе шамамен 11,5 миллиард теңге көлемінде сыйақы беріледі. Бұл туралы Sportinside.kz хабарлады.
Бірақ...
"Қайрат" бұл соманы иемденуі үшін Чемпиондар лигасының топтық кезеңіне өтуі тиіс, ал оған жету үшін команда тағы екі қарсыласын жеңуі керек. Үшінші іріктеу кезеңінде алматылық клуб Словакияның "Слован" командасымен кездеседі.
Айта кетейік, "Қайрат" биылғы маусымдағы еурокубоктық жорығын сенімді бастады:
- Алғашқы іріктеу кезеңінде Словенияның "Олимпиясын" 3:1 есебімен жеңді;
- Екінші раундта Финляндияның "КуПС" клубын 3:2 есебімен ұтты.
Алда не күтіп тұр?
Егер "Қайрат" "Слованды" өтсе, плей-офф кезеңіне жолдама алады. Бұл кезеңді де сәтті еңсерсе, топтық кезеңге өтіп, миллиондар клубына айналады.