Бельгиямен ойын алдында жағымсыз жаңалық жетті (ВИДЕО)
Қазақстан ұлттық құрамасының бас бапкері Әли Әлиев алдағы Бельгиямен болатын іріктеу матчы алдында футболшылардың жағдайына тоқталды. Бұл туралы Қазақстан футбол федерациясының ресми баспасөз қызметі хабарлады.
Әли Әлиев құрамдағы қиындықтарды айтты
— Еркін Тапалов пен Ислам Чесноковтың жағдайы қалай? Ертеңгі ойында Темірлан Анарбеков алаңға шыға ма?
— Еркін Тапалов бұл кездесуге қатыспайды. Оның тізе шеміршегіне ауыр жарақат түскен, сондықтан ол үйде қалды.
Ислам Чесноков пен бірнеше ойыншыда микрожарақаттар болды. Қазір оларды емдеп шықты, тек аздаған жарақат салдары қалды. Команда дәрігерлері оларды толық қалпына келтіруге тырысуда.
— Уэльс ойыншысымен соқтығысқаннан кейін Нұралы Әліптің жағдайы қалай?
— Барлығы жақсы. Нұрик өте көп жұмыс атқарды, соған алғыс айтамыз. Бірнеше рет қарсыластың айып алаңына дейін жетіп үлгерді, сол себепті бұлшық еттері құрысып қалды. Жарақат алып қалмас үшін өзі ауыстыруды сұрады. Ойнауға дайын болады.
Қақпашылар мәселесі
Әлиевтің айтуынша, қақпашылар құрамында сенімді топ бар. Дегенмен Темірлан Анарбеков соңғы күндері айтарлықтай жүктемеге тап болды:
«10 күн ішінде үш ауыр матч, оның ішінде Чемпиондар лигасындағы ойын, Көкшетаудағы «құрғақ» кездесу, әрі қарай Уэльспен өткен іріктеу ойыны.
Бұл физикалық жағынан да, психологиялық тұрғыда да үлкен сынақ болды. Ертең шешімді медициналық штаб қабылдайды», — деді бапкер.
Соңғы нәтижелер және алдағы матч
Қазақстан құрамасы «Астана Аренада» Уэльске 0:1 есебімен жеңілді.
Келесі ойын 2025 жылдың 7 қыркүйегінде сырт алаңда Бельгияға қарсы өтеді.