Өзбекстан құрамасының ойыншыларын неміс футболының аңызы жаттықтырады
Ыстамбұлдың «Башакшехир» клубы маусым басындағы сәтсіз нәтижелерден кейін батыл қадамға барды. Түркиялық БАҚ мәліметінше, команда басшылығы бас бапкер Чагдаш Атанмен келісімшартты бұзды.
«Башакшехир» жаттықтырушымен қош айтысты
Атан жетекшілігіндегі клуб 47 рет жеңіске жетіп, 22 ойында тең түсті, 29 матчта жеңіліс тапты. Дегенмен биылғы маусымда «Башакшехир» Еуропа Конференциялар лигасының іріктеуінен өте алмады. Ал Түркия Суперлигасындағы алғашқы екі кездесу де тең аяқталып, күткен нәтижені бермеді.
Өзбекстан жұлдыздары ойнайтын клубқа жаңа бапкер
Қазір команданың жаңа бас бапкері ретінде Нури Шахиннің есімі жиі аталып жатыр. Бұл клубта Өзбекстан құрамасының көшбасшылары Эльдор Шомуродов пен Аббосбек Файзуллаев өнер көрсетеді. Сондықтан жаттықтырушы ауысуы өзбек футболшыларының ойынына да тікелей әсер етуі ықтимал.
Нури Шахин кім?
Шахин — дортмундтық «Боруссияның» түлегі. Ол аталған клубта 135 матч өткізіп, Бундеслига тарихында өзіндік із қалдырды. Кейіннен Мадридтің «Реалы» мен Англияның «Ливерпуль» клубында да өнер көрсетті.
Футболшы Германияда дүниеге келгенімен Түркия құрамасының намысын қорғады. Ұлттық құрама сапында 52 матчқа шығып, екі гол соққан.