Аңыздар арасындағы жанжал: Коста тағы да Шкртелге қарсы ашуға мінді
Бүгін «Стэмфорд Бридж» стадионында «Челси» мен «Ливерпуль» аңыздары арасында қайырымдылық кездесуі өтті. Бірақ ойын достық сипатта өтеді деген үміт көпке созылмады — алаңда бұрынғыдай эмоциялар қайнап тұрды.
Реванш матчы және жұлдызды құрам
Бұл кездесу нағыз реванш болды. Биыл наурыз айында дәл осы командалар «Энфилдте» ойнап, ол кезде «қызылдар» 2:0 есебімен жеңіске жеткен еді. Сол ойында Питер Крауч дубль авторы атанған болатын. Бірақ бүгін ол алаңға шықпады. Сондай-ақ Стивен Джеррард, Сами Хююпя мен Дирк Кюйт та қатыспады.
Ал «Челси» сапында керісінше жаңарған жұлдызды құрам: Петр Чех, Джо Коул, Эден Азар және ең эмоциялық ойыншылардың бірі — Диего Коста алаңға шықты.
Коста эмоцияға беріліп кетті
Матч барысында нағыз шиеленіс болды. Мартин Шкртел тайсалмай Костаға қарсы қатты сырғанап, оны жерге құлатты. Бұған ашуланған Диего Коста орнынан атып тұрып, қарсыласына қатқыл сөз айтты. Біраз уақыттан соң ол қасақана денесімен соғылып, төрешіден сары қағаз алды.
Бұл екеуінің алғашқы жанжалы емес: 2015 жылы «Челси» мен «Ливерпуль» арасындағы матчта Коста Шкртелдің үстінен әдейі басып өтіп, қызыл карточкадан сәл ғана құтылып кеткен болатын.
Ардагерлер әлі де қайратты
Айта кетсек, Мартин Шкртел қазір 40 жаста, кәсіби мансабын 2022 жылы аяқтаған. Ал Диего Костаға 37 жас, ол ресми түрде аяқ киімін ілген жоқ және әлі де формада екенін көрсетті.
Матч тартысты өткенімен реванш сәті жүзеге аспады. «Ливерпуль» аңыздары 1:0 есебімен жеңіске жетті. Жеңіс голының авторы – Райан Бабел.