Алматы қалалық қоғамдық денсаулық сақтау басқармасы «Хан-Тәңірі» ФК 19 жастағы ойыншысы Диас Төлеудің қазасына байланысты алғашқы ресми ақпарат таратты. Жас футболшы Қазақстанның Бірінші лигасы аясындағы матч кезінде кенеттен өзін жайсыз сезініп, алаң үстінде есінен танып қалған еді.
Kazinform агенттігі таратқан дерекке сүйенсек, Диас Төлеу ауруханаға клиникалық өлім жағдайында жеткізілген.
«2006 жылы туған науқас Алматы қаласындағы Орталық қалалық клиникалық ауруханаға клиникалық өлім күйінде жеткізілді. Оны оқиға орнында кезекшілік еткен жедел жәрдем қызметі жеткізген. Қабылдау кезінде науқастың пульсі мен қан қысымы болмады, көз қарашығы кеңейген. Дәрігерлер 30 минут бойы жүрек-өкпе реанимациясын жасады. Өкінішке қарай, барлық шараларға қарамастан, өмір белгілерін қалпына келтіру мүмкін болмады. Биологиялық өлім тіркелді», — делінген басқарманың ресми хабарламасында.
Қазіргі таңда Диас Төлеудің денесі сот-медициналық сараптамаға жіберілді. Мамандар өлімнің нақты себебін анықтау үшін зерттеу жүргізуде.
Ойынның бейнетрансляциясына қарағанда, Диас Төлеу алаңда өзін жайсыз сезінген сәттен кейін бірден медициналық көмекке жүгінуге мәжбүр болған. Команда дәрігерлері футболшыны зембілмен алаң сыртында жеткізді.
Диас Төлеу — алматылық «Қайрат» академиясының түлегі. Ол биылғы маусымда «Хан-Тәңірі» сапында 25 матч өткізіп, 3 гол соғып, 4 нәтижелі пас берген.