«Қайрат» Алматыны тастап, Чемпиондар лигасын Астанада өткізеді

Матчтар елордада өтеді

Бұл туралы Goal.kz жазады. 29 қазан күні «Қайрат» клубының өкілдері Астанаға келіп, MTEX Management компаниясымен келіссөз жүргізді. Бұл ұйым — елорданың ірі спорттық және мәдени нысандарын басқаратын құрылым.

Кездесуде басты тақырып ретінде «Астана Арена» стадионын жалға алу мәселесі талқыланды. Клуб енді Чемпиондар лигасындағы екі маңызды ойынын дәл осы аренада өткізеді:

• 9 желтоқсан 2025 жыл — «Қайрат» vs «Олимпиакос» (Грекия)
• 20 қаңтар 2026 жыл — «Қайрат» vs «Брюгге» (Бельгия)

Дереккөз мәліметінше, тараптар сәтті келісімге келген.

Бұған дейін Алматыда ойнаған

Турнирдің алғашқы екі үй кездесуін «Қайрат» Алматыдағы «Орталық» стадионда өткізген болатын:

• «Реал» — 0:5
• «Пафос» — 0:0

Үш турдан кейін Рафаэль Оразбахтиннің шәкірттері жалпы кезеңнің турнир кестесінде 34-орында, еншісінде — 1 ұпай.

2025 жылғы маусым қорытындысы бойынша «Қайрат» Қазақстан чемпионы атанды. Осылайша, команда 2026/27 маусымындағы УЕФА Чемпиондар лигасының іріктеу кезеңіне қатысу құқығын иеленді.