Ол Қазақстан Премьер-лигасындағы ең жоғары еңбекақы алатын қақпашылардың бірі екен.
«Ақтөбе» қақпашысы қанша жалақы алатыны белгілі болды. Румыниялық қақпашы Андрей Влад ай сайын 9 миллион теңгеден астам (18 мың доллар) табыс табады. Яғни ол Қазақстан Премьер-лигасындағы ең жоғары еңбекақы алатын қақпашылардың бірі. Бұл туралы asnews.kz хабарлады.
Бірақ клуб оған балама іздей бастаған. Қазір «Ақтөбе» бірнеше үміткермен келіссөз жүргізіп жатыр. Румын ойыншысы 2025 жылғы маусымда команданың негізгі ойыншысы ретінде тұрақты ойнады.
Дегенмен 25-турдағы «Астанаға» қарсы матчтан (3:5) кейін оған қатысты сын күшейді.
Сол ойында ақтөбеліктер 3 гол соққанымен, 5 гол өткізіп алды, ал кей жанкүйерлер мен сарапшылар қақпашының әрекеттерін сәтсіз шешімдер қатарына жатқызды.
Андрей Влад – Румынияның “Стяуа” (FCSB) клубының түлегі. Ол бұл командада жеті маусым ойнап, ел чемпионаты мен Кубок жарыстарына қатысқан. Ұлттық құрама сапында бір ресми матч өткізген. 2024 жылы «Ақтөбеге» ауысты. Клубпен арадағы келісімі 2026 жылдың соңына дейін жарамды.