Өзбекстанның жасөспірімдер құрамасы (U-17) 2025 жылғы әлем біріншілігіне қызу дайындалып жатыр. Команданың оқу-жаттығу жиынында тәртіп қатаңдатылып, ойыншылар үшін бірқатар шектеу енгізілген.
U-17 құрамасының бас бапкері Ислом Исмоилов ойыншылардың күн тәртібін қатаң бақылауға алған. Оның шешімі бойынша футболшылардың телефондары күн сайын сағат 21:30-да жиналып алынады.
Бапкер бұл қадамды түсіндіре отырып:
"Жас футболшылар жақсы ұйықтап, ертеңгі жаттығуларға толық дайын болуы тиіс. Ал телефон — негізгі алаңдатушы факторлардың бірі", — дейді Исмоилов.
Қазір өзбекстандық жас футболшылар U-17 әлем чемпионатының 1/16 финалындағы маңызды кездесуге дайындалып жатыр. Бұл кезеңде олар Еуропаның мықты командаларының бірі — Хорватия құрамасымен күш сынасады.