Әлемге әйгілі португалиялық бапкер Жозе Моуринью кәсіби карьерасындағы 750-ші жеңіс межесін еңсерді. Қазір ол Лиссабонның «Бенфика» клубын жаттықтырады.
Тарихи көрсеткіш Португалия кубогы аясында келді. «Бенфика» «Фаренсені» 2:0 есебімен ұтып, турнирдің ширек финалына жолдама алды.
Ойыннан кейін клуб президенті Руй Кошта киім ауыстыратын бөлмеде Моуриньюға есімі жазылған және «750» саны бейнеленген естелік жейдені табыстады.
Бапкер бұл межені атап өтуде бастысы – келесі қадам екенін жеткізді. Оның сөзінше, өткен жеңістер қанша көп болғанымен, ең маңыздысы – келесі матчтағы нәтиже, яғни 751-ші жеңіс.
Лиссабондық клуб Португалия чемпионатында жүлде үшін таласып жатыр. Қазіргі таңда «Бенфика» турнир кестесінде үшінші орында келеді және қоржынында 32 ұпай бар.