Қазақ футболшы "Бенфика" сапында алты гол соқты
Португалиядағы әйгілі "Бенфика" академиясында доп тебетін 15 жастағы вингер Шыңғыс Әлікеев жасөспірімдер арасындағы ел чемпионатында кезекті нәтижелі ойынын өткізді.
U-16 матчындағы жарқын эпизод
Әлікеев Португалияның жасөспірімдер біріншілігінің 6-туры аясында "Амора" U-16 командасына қарсы 69 минут алаңда болды.
Ойын барысында қапталдан ортаға қарай ығыса кірген шабуылшы қақпашыны әдемі түрде алдап, допты үстінен асыра теуіп гол соқты. Нәтижесінде "Бенфика" қарсыласын 5:1 есебімен ойсырата жеңді.
U-17 құрамасында да көзге түсті
Бір апта бұрын астаналық ойыншы "Бенфика" U-17 командасының матчына да шақырту алған. Қазір бұл ұжым лига кестесінде көш бастап тұр. Сол ойында Әлікеев 25-минутта "Маришташу" қақпасына гол соғып, командасының 4:0 есебімен жеңуіне үлес қосты.
Осылайша Шыңғыс Әлікеевтің биылғы маусымдағы барлық турнирдегі көрсеткіші — 11 матчта 6 гол. Айта кетерлігі, вингер жарақатына байланысты бірнеше апта өткізіп алған.