Жамбыл Көкеев Қазақстан құрамасының жаңа бас бапкеріне баға берді
Қазақстан құрамасының бас бапкері қызметіне жуырда Джон ван ’т Схип тағайындалған еді.
Қазақстан ұлттық құрамасының бас бапкері тағайындалғаннан кейін футбол қауымдастығында жаңа маманға қатысты пікірлер айтыла бастады. Бұрынғы футболшы Жамбыл Көкеев Джон ван ’т Схиптің тағайындалуына қатысты өз пікірін жеткізді.
Жамбыл Көкеевтің ойынша, Джон ван ’т Схип секілді маманды шақыру Қазақстан футболы үшін салмақты шешім.
"Мұндай маманның тағайындалуы — қазақстандық футбол үшін өте күшті қадам. Оның голландиялық мектептен өткені, "Аякс" жүйесінде және Нидерланд құрамасында жұмыс істегені маңызды. Бұл — әлемдегі ең үздік футболдық бағыттардың бірі", — деді Көкеев.
"Заманауи футболды жақсы түсінеді"
Бұрынғы футболшы жаңа бапкердің халықаралық тәжірибесіне ерекше назар аударды.
Көкеевтің айтуынша, Джон ван ’т Схип заманауи футболдың талаптарын жақсы түсінеді және ойыншылардан не қажет екенін біледі.
"Оның халықаралық тәжірибесі мол. Ол заманауи футболды және ойыншыларға қойылатын талаптарды түсінеді. Менің ойымша, оның білімі мен әдісі ұлттық құрамаға жаңа серпін беріп, команданың алға басуына көмектесуі мүмкін", — деп атап өтті ол.
Джон ван ’т Схип ресми түрде таныстырылды
Бұған дейін Джон ван ’т Схиптің Қазақстан құрамасының жаңа бас бапкері болып тағайындалғаны белгілі болған еді.
Маманның ресми таныстырылымы Қазақстан футбол федерациясының кеңсесінде өтті.