"Астана" камбэк жасап, ҚПЛ-дегі үшінші орнын нығайтты (ВИДЕО)
"Астана" ФК Қазақстан Премьер-Лигасының 21-турында Көкшетаудың "Оқжетпесін" қабылдап, 2:1 есебімен жеңіске жетті.
"Оқжетпес" алға шықты
Қонақтар бірінші таймда алға шықты. Бұрыштамадан кейін Борис Лотоцкий әуедегі допқа бірінші жетіп, баспен дәл соққы жасады.
Бірақ жіберілген голдан кейін "Астана" қарқынын күшейтіп, қарсылас қақпасына қысымды арттырды.
Бартолец пен Томасовтың камбэгы
Елордалық клубтың шабуылдарының бірінде Карло Бартолец айып алаңына батыл кіріп, допты қақпаның алыс төменгі бұрышына бағыттады. Көп ұзамай "Астана" тағы бір нәтижелі шабуыл ұйымдастырды. Бұл жолы мергендігімен Марин Томасов көзге түсті.
Алаң иелері екінші таймда допқа көбірек иелік етіп, кездесу барысын бақылауда ұстады. Көкшетаулықтар есепті теңестіруге әрекет жасағанымен елордалықтардың қорғанысын бұза алмады.
Кестедегі жағдай
Осы жеңістен кейін "Астананың" қоржынында 38 ұпай болды. Елордалық команда Қазақстан Премьер-Лигасының турнирлік кестесіндегі үшінші орнын нығайтты.
Ал 33 ұпайы бар "Оқжетпес" төртінші орында келеді.