Футболдан ересектер жіберген есені жастар қайтарды
Қазақстан Шотландияны ұтты.
2025 жылғы Еуропа чемпионатына іріктеу аясында 21 жасқа дейінгі ұлттық құрамамыз Алматы қаласында Шотландия командасын қабылдады. Ойынды қонақтар белсенді бастады. Десе де 30-шы минутта Қазақстан сапындағы Айбар Абдулла есеп ашып, жанкүйерлерді қуантты және дәл осы нәтиже бірінші кезең соңына дейін өзгермеді.
Ал, екінші таймда шотландиялық Леннон Миллер таразы басын теңестірді. Артынша, командаласы Дейн Маррей ережені өрескел бұзып, жасыл алаңнан қуылды. Әділбек Жұмаханов осы мүмкіндікті сәтті пайдаланып, айып добын голға айналдырды. Көп ұзамай тағы бір қазақстандық Ян Труфанов есепті 3:1-ге жеткізсе, қонақтар қатарындағы Жереми Мюллен есеп айырмасын қысқартып үлгерді. Қорытынды нәтиже 3:2.
Айта кетейік, наурыз айында сырт алаңда қос команда арасында өткен алғашқы мачта шотландықтар 4:1 есебімен жеңіске жеткен болатын.
Сонымен іріктеу кезеңі аяқталды. Қазақстан құрамасы 9 ұпай еншілеп, өз тобында 5-ші сатыға тұрақтады. Шотландия үшінші орында. Ал, топ басына Испания жайғасты және дәл осы команда 2025 жылғы құрлықтық додаға тікелей жолдама алды.