Хоккейден Қазақстан ерлер құрамасы алдағы Азия чемпионатына қатысу үшін жаңа бас бапкерді бекітті. Команданы бұл жолы «Барыс» ХК жаттықтырушысы Талғат Жайлауов бастап шығады.
Азиядағы басты хоккей додасы 20–23 қараша күндері Қытай астанасында өтеді. Бұл — ерлер арасындағы Азия чемпионатының тарихтағы екінші маусымы.
Қазақстан құрамасы — аталған турнирдің қазіргі чемпионы, сондықтан Бейжіңге ел намысын қорғауға және атағын сақтап қалуға барады.
40 жастағы Талғат Жайлауов бұған дейін де ұлттық құраманың бапкерлік штабында жұмыс істеген. Ол Олег Болякин жетекшілік еткен кезеңде Азия чемпионаты мен әлем чемпионатында (Хернинг, Дания) көмекші бапкер болған.
«Біздің мақсат — Азия чемпионатында жоғары нәтиже көрсету және Қазақстан хоккейінің деңгейін тағы бір сатыға көтеру», — деп атап өтті Жайлауов.
Жарыс алдында команда Астанада оқу-жаттығу жиынын өткізіп, тактикалық және физикалық дайындыққа басымдық береді. Құрамның негізгі бөлігі Қазақстан чемпионатында өнер көрсетіп жүрген ойыншылардан жасақталады.