Азиада-2025: Қазақстандық хоккейшілер плей-оффқа мерзімінен бұрын шықты (ВИДЕО)
06.02.2025, 19:27
Хоккейден Қазақстан әйелдер құрамасы Харбинде үшінші матчын өткізді.
offside.kz
Бұл жолы хоккейшілерімізге Қытайлық Тайпей құрамасы қарсылас болды. Бірінші кезңі тең нәтижемен аяқталды. Қазақстан сапында Лариса Свиридова мергендік танытты. Ал екінші кезеңде кездесу фавориті төрт шайба енгізді. Надежда Филимонова дубль жасаса, Юлия Буторина мен Малика Алдабергенова бір шайбамен көзге түсті. Матчтағы қорытынды есеп — 5:1.
- Бұған дейін қыздар Гонконг (12:0) пен Таиландтан (9:0) басым түскен.
- Келесі ойын 9 ақпанда Оңтүстік Кореяға қарсы өтеді.
Осылайша Қазақстан А тобынан мерзімінен бұрын плей-офф сынына жолдама алды. Әлемдік рейтингке сәйкес бұған дейін Жапония мен Қытай жарыстың бұл бәсекесіне шыққан еді. Төрт құрама өзара кездесіп, медаль жиынтығын сарапқа салады.