"Барыс" бір күнде 5:16 есебімен жеңілді
Астананың "Барыс" хоккей клубы Құрлықтық хоккей лигасының (ҚХЛ) 3х3 форматындағы чемпионатында бір күн ішінде екі рет жеңіліс тапты.
Бүгін қазақстандық ұжым Омбының “Авангарды” және Магнитогорскінің “Металлургімен” кездесті. Өкінішке қарай екі ойында да жеңіс ресейлік клубтарға бұйырды.
Алғашқы матчта “Барыс” “Авангардқа” 1:9 есебімен ойсырай ұтылды. Елордалық клубта жалғыз шайба Руслан Оспановтың атына жазылды. Бір қызығы Оспанов есеп ашқан еді.
Кейін “Барыс” “Металлургтен” 4:7 есебімен тағы да жеңілді. Бұл матчта Станислав Александров дубль жасады, ал Вячеслав Колесников пен Дмитрий Макеев бір-бірден шайба соқты.
Қазір “Барыстың” қоржынында 17 ұпай бар. Команда өз дивизионында және жалпы лигада соңғы орыннан көтеріле алмай келеді. ҚХЛ 3х3 чемпионатына барлығы сегіз клуб қатысып жатыр.