Волейболдан әйелдер арасында Ұлттық лигада өнер көрсететін «Астана» ВК кезекті рет бас бапкерін ауыстырды. Команда қыркүйек айынан бері тізгінді ұстаған Светлана Котовамен келісімшартын тоқтатқан.
Котованың орнына команданың жаңа бапкері ретінде Украинадан келген Евгений Николаев тағайындалатыны айтылды.
Еске салайық, бұл маусымды «Астана» Мейірбек Нұғұспановтың жетекшілігімен бастаған. Ол бір мезетте клуб директоры әрі бас бапкер қызметін қатар атқарды. Алайда Қазақстан кубогының алдын ала кезеңіндегі сәтсіздіктен кейін Нұғұспанов бапкерлік міндеттен кетіп, команда тізгінін Светлана Котоваға тапсырған еді.
Енді Ұлттық лига 2025/2026 маусымының тұрақты чемпионатындағы екі айналымнан соң «Астана» қайтадан бас бапкерін ауыстырды. Қазіргі жағдай бойынша елордалық ұжым ұпайсыз қалып, турнир кестесінің соңғы орнында келеді.
Айта кетейік, осы маусымда «Астана» құрамында қазақстандық танымал волейболшы Сәбина Алтынбекова ойнап жүр.