Софья Самоделкина: "Бұл менің үздік маусымым"
Қазақстандық мәнерлеп сырғанаушы Софья Самоделкина ӘЧ-2026-ға қатысты қорытынды жасады.
Қазақстан құрамасының мәнерлеп сырғанаушысы Софья Самоделкина Прагада (Чехия) өткен әлем чемпионаты мен жалпы маусым қорытындысына өз бағасын берді.
"Өзімді жақсы сезініп тұрмын, бірақ еркін бағдарламаға сәл көңілім толмайды. Жаман болған жоқ, бірақ өте жақсы да болмады — жай ғана қалыпты деңгейде өтті. Жаттығуда одан жақсырақ сырғанаған едім", — деді Самоделкина.
Жарақат толық дайындалуға мүмкіндік бермеген
Қазақстандық спортшы маусым барысында жарақатпен күрескенін де жасырмады.
"Жарақатым әлі де мазалайды. Сондықтан толыққанды жаттығу жасай алмадым. Күніне бір жарым сағат қана жаттықтым, өйткені тіземді күтуім керек болды", — деп түсіндірді ол.
Оның айтуынша, енді негізгі мақсат — толық қалпына келу.
"Бұл менің ең үздік маусымым"
Қиындықтарға қарамастан, Самоделкина бұл маусымды жоғары бағалады.
"Бұл маусым мен үшін өте жақсы өтті. Иә, жарақаттар болды, қиын сәттер болды, бірақ жалпы алғанда — бұл менің ең үздік маусымым. Келесі маусым одан да жақсы болады деп үміттенемін", — деді спортшы.
ӘЧ-2026 нәтижесі
Прагадағы әлем чемпионатында Софья Самоделкина:
- Қысқа бағдарламада — 66.95 ұпай (12-орын)
- Еркін бағдарламада — 120.58 ұпай (12-орын)
- Жалпы — 187.53 ұпаймен 12-орын алды
Маусым аяқталғаннан кейін спортшы енді отбасымен кездесуді, достарымен бірге уақыт өткізуді жоспарлап отыр.
"Қазір тек демалып, қалпына келгім келеді. Мүмкін, басқа елге де барып қайтармын", — деді Самоделкина.