Бибісара Асаубаева Жавохир Синдаровтан жеңіліп қалды (ВИДЕО)
Әлеуметтік желіде қазақстандық шахматшы Бибісара Асаубаева мен өзбекстандық гроссмейстер Жавохир Синдаров арасындағы блиц партияның видеосы тарады.
Архивтік видео желіде қайта жарияланды
Uzchess Instagram-парақшасы 2023 жылы өткен “Satty Zhuldyz 2023” шахмат фестиваліндегі блиц турнирдің видеосын жариялады. Онда сегізінші турда Бибісара Асаубаева Жавохир Синдаровқа қарсы ойнаған.
Кадрларда қос шахматшы арасындағы блиц партияның шешуші сәттері көрсетілген. Кездесудің басында екі тараптың да мүмкіндігі тең болған. Бірақ ойын барысында Бибісара маңызды қателікке жол беріп, қарсыласына бастаманы беріп қойды.
Синдаров мүмкіндігін тиімді пайдаланды
Жавохир Синдаров қазақстандық шахматшының қателігін ұтымды пайдаланып, позициялық басымдыққа ие болды. Өзбекстандық гроссмейстер артықшылығын сақтап қана қоймай, партияны сенімді түрде жеңіспен аяқтады.
Бұл кездесу шахмат жанкүйерлері арасында қайта талқыланып жатыр. Себебі екі спортшы да соңғы уақытта халықаралық аренада ерекше көзге түсуде.
Асаубаева мен Синдаров “Үміткерлер турнирінде” сәтті өнер көрсетті
Бибісара Асаубаева мен Жавохир Синдаров жуырда Кипрдің Пафос қаласында өткен “Үміткерлер турнирі-2026” додасында сәтті нәтиже көрсетті.
Қазақстандық шахматшы турнирде күміс жүлдегер атанса, Өзбекстан өкілі жарыстың жеңімпазы болды. Бұл нәтиже екі гроссмейстердің де әлемдік шахматтағы беделін одан әрі арттыра түсті.
Бұған дейін БАҚ-та Бибісара Асаубаева мен 20 жастағы өзбекстандық гроссмейстер Жавохир Синдаровтың қарым-қатынасы туралы түрлі болжамдар айтылған еді.
Мұндай әңгімелер Бибісараның әлеуметтік желіде Синдаровпен бірге түскен суреттерін жариялағаннан кейін күшейген.