Қазақстандық таэквондошылар халықаралық турнирде топ жарды
Жуырда Қатар астанасы Дохада таэквондоның олимпиадалық бағыты бойынша халықаралық турнир өткен болатын.
Қатар астанасы Доха қаласында таэквондоның олимпиадалық бағыты бойынша халықаралық турнир өтті. Нәтижесінде, ұлттық құрама спортшылары ересектер арасында 8 алтын, ал, жастар арасында 5 алтын жеңіп алып, жалпыкомандалық есепте топ жарды.
Атап айтқанда, ересектер арасында Тамерлан Тілеулес, Нұрбек Ғазез, Бекарыс Бекенов және Әбдірахман Маримовтар барлық қарсыласын ұтып, жарыс жеңімпазы атанды.
Әйелдер арасында дәл осындай жетістікке қазақстандық Мария Севостьянова, Нұрай Бауыржанова, Нұрай Құсайынова және Назым Махмұтова жетті.
Жастар арасында Ұлықбек Торавеков, Егор Шаптефраць, Шахризода Акрамова, Нұргүл Сералиева және Нұрай Амангелді алтын жүлдеге қол созды.
Бұған қоса, ересектер сапында 4 күміс және 9 қола жүлдегер болса, жастар арасында 8 спортшымыз күміс алды. 6 спортшымыз үздік үштікті түйіндеді.